कुवेत, कुवेतमा करिब ७० लाख रुपैयाँ (२० हजार दिनार) चोरी अभियोगमा एक वर्ष जेलको सजाय पाएकी सिन्धुपाल्चोककी एक महिलाले कानुनी प्रतिरक्षाका लागि पुनरावेदन अदालतमा अपिल गरेकी छन् ।

घरेलु कामका लागि कुवेत पुगेकी ती महिलाले नेपाली समुदायका तर्फबाट कानुनी प्रतिरक्षा गर्न वकिल पाएपछि पुनरावेदनमा अपिल गरेकी हुन् । पीडितलाई प्रवासी नेपाली श्रमिक संघ (जिफन्ट सपोर्ट समूह) ले कुवेत ट्रेड युनियनको समन्वयमा कुवेती वकिल जुटाएको अध्यक्ष अर्जुनबहादुर बस्नेतले बताए ।

‘६ वर्षसम्म एउटै मालिकको घरमा काम गर्दै आएकी थिएँ । मालिकले दुई—दुई वर्षमा घर पठाउने सर्त गरेका थिए । करार अवधि सके पनि घर नपठाएपछि आफ्नो राहदानी मात्रै लिएर घरबाट भागेर बाहिर निस्किएको थिएँ,’ महिलाको भनाइ उद्धृत गर्दै संघका महासचिव गणेश राउतले भने , ‘बाहिर आएपछि कसरी घर फिर्ने भनेर भौंतारिरहेका बेला प्रहरीले पक्राउ गरेको थियो ।’

प्रहरीले घरबाट निस्केको दुई महिनापछि फाइलबाट गैरकागजात भएको अवस्थामा पक्राउ गरेको थियो । घर पठाउनका लागि प्रहरीले छानविन गर्दा कुवेती मालिकले २० हजार दिनार चोरी गरी भागेको भन्दै उजुरी दिएको खुलेको ती महिलाले बताइन् । ‘मैले राहदानी मात्रै लिएर भागेको भन्दा विश्वास भएन । म एक्लैले ममाथि लागेको अभियोगविरुद्ध लड्न सकिनँ,’ उनले भनिन्, ‘मेरो कुरा कसैले पनि सुनेन ।’

उनलाई स्थानीय सोलोदियास्थित केन्द्रीय महिला कारागारमा राखिएको छ । जेलबाट महिला सम्पर्कमा आएपछि संघका महासचिव राउत उनलाई भेट्न गइरहने बताए । ‘आफू निर्दोष भएको दाबी गरिरहेकी छन् । त्यही भएर मुद्दा लड्नमा कुवेतको ट्रेड युनियनलाई भन्यौं । उनीहरूले २० नम्बर भिसा (घरेलु कामदार) मा आएकालाई मुद्दा लड्न नमिल्ने बताएपछि सहुलियत दरमा वकिल खोजिदिए,’ राउतले भने, ‘सस्तो दर (एक लाख रुपैयाँ) मा वकिल पाएका छौं । उनले मुद्दाको जिम्मेवारी लिइसकेका छन् ।’

महिलाले आफूमाथि ठूलो अन्याय भएको बताएकी छन् । ‘६ वर्षसम्म घर नपठाउँदासम्म मालिकलाई केही नहुने । मैले चोरेको भन्ने प्रमाण पनि छैन । अभियोग मात्रै लगाइदिए पुग्ने,’ महिलाले भनिन्, ‘पुनरावेदनबाट मलाई निर्दोष गर्ने आशा राखेको छु ।’

ती महिलालाई दूतावासबाट गएको प्रतिनिधिले भेटेका थिए । दूतावासले अदालतबाट फैसला भएपछि कूटनीतिक पहलबाट जुटाउन नमिल्ने जनाएको छ । नेपाली दूतावाससँग वकिल राखेर मुद्दा लड्न बजेटको व्यवस्था सरकारले गरेको छैन । साभार इकान्तिपुर बाट